Monday, November 16, 2020

अंधारमाया !!

ओलेत्या ओंजळ भरल्या निष्पाप अनामिक धारा !

संदर्भ तयांवर झुरतो वेदनातळीचा सारा !

एकांतांच्या घनरानी अलवार पंख सोनेरी !

मिटवून निमाली स्वप्ने निद्रिस्त कड्यांवर सारी !


पाऊल उठे मग कोठे, विश्रांत तमावर माझे !

माथ्यावर आसुसलेले नशिबाचे निर्दय ओझे !

श्वासांना चाहूल वेडी ,अद्याप मुग्ध वाऱ्याची !

काळजात मिणमिण आशा ,सोनेरी सूर्यशरांची !


अर्थावर अर्थ उमटती ,गात्रांवर चढतो साज !

बुडलेल्या संध्येमधूनी ,ये रात्रसुरांची गाज !!

गंभीर समुद्रांवरती ,वायूंचे घोर विहरती !

अंधारामधूनी येते का अंधाराला भरती !!


------&-*-*लेखन - हर्षल 


No comments:

Post a Comment